alle News
Vörwiehnachts-Törn üm de Kanaren

Herrlicher Bericht über eine Blauwasser-Reise im Advent - auf Platt

  • Uwe Janßen
 • Publiziert am 23.12.2004

Mit einer Reise zwischen den Kanarischen Inseln haben sich YACHT-Leser Erhard Brüchert aus Edewecht und sein Sohn den Advent versüßt. Ihre Erlebnisse haben sie in einem ungewöhnlichen Törnbericht zusammengefasst - auf Plattdeutsch. Lust auf mehr haben die beiden dabei auch noch bekommen: "Wiehnachten in de Karibik! Dat weer doch wat!"

Van Erhard Brüchert

Dat is een Wunner, dat de massige Flinten van de groote Habenmüür in Puerto de Mogan nich na unnern wechsacken, wor dat tüschen de Vulkan-Inseln Gran Canaria un Teneriffa doch up 2.700 Meters daalgeiht. Man doran bruuken wi nich to denken. Wi wüllt tja nich U-Boot fohrn, nee, mien Sön un ik, wi beid wüllt in de eerste un tweede Adventsweek mit een Charter-Seilyacht - "Sun Odyssee 34" - üm de Kanarische Inseln seilen.

De Yacht is tipptopp, un wi hebbt allens na een Dag up de Reeg. Wi chartern tja ok nich dat eerste Mol, man hier - in ´n Atlantik - is dat anners as in Nordsee, Ostsee, IJsselmeer off in de Adria. Hier hebbt wi to ´n eersten Mol dat echte Blau-Water-Seilen. Dat deepe Water rund üm de vulkanischen Inseln van de Kanaren hett würklich een deepblau Klör, een Klör, de dat blots up de Ozeane gifft. Un ok de Affstand tüschen de Inseln Gran Canaria, Teneriffa un La Gomera is mit dartig bit sesstig Seemeilen ok so groot, dat wi mit de tein Stünnen Dagslücht in ´n Dezember haast nich hennkomen - un in ´n Düstern seil ik nich so geern, in een frömden Revier, ok wenn us Schipp all Navigationsmiddel an Bord hett un mien Sön mi dormit targen deiht, dat ik ´n oolen Baangbüx weer. Worüm seilen wi överhaupt so laat, in ´n Dezember? Wieldat mien Sön sük dat nu jüst in ´n November mit sien Jura-Examen verdeent hett - un du annerworrns in Europa üm disse Tiet slecht seilen kannst.

Toeerst geiht dat langs de Westküst van Gran Canaria. Ruhig Weer, Wind 3 bit 5, also keen Problem - in ´n Affstand van twee bit dree Seemeilen van de felsige Küstenkant. Överall de Vulkansteenen, haast heel keen Sandstrand to seen, wor gahn de Touristen hier eegentlich int Water? Wi töben ok dormit, bit dat wi in ´n Haben van Puerto de Nieves anleggt hebben un gahn denn bi rund twintig Grad över een swatten Vulkan-Sandstrand näben de Haben int Water. Nich slecht sowat, bi 25 Grad Lüchttemperatur in ´n Dezember!

An ´n annern Dag mööt wi de 45 Seemeilen na Santa Cruz up Teneriffa röver. Mööt wi dat? Mien Sön will dat - ik bün unsäker. Man, dit blau Water! Un dat richtige Blau-Water-Seilen gifft dat tja eerst tüschen de Inseln. Un de Wär-Forcast in ´n Funk is ok goot. Also seilen wi al um Klock nägen los, denn ik weet: üm Sess warrt dat düster. Dor geiht keen anner Yacht an dissen Dag in ´n Advent up Kurs na Teneriffa, blots de "Fred-Olsen-Line" brängt mit ehr Ferrys de Touristen röver. All Stünnen fohrt een van de Kolossen mit hoog Tempo an us vörbi. Naja, so weet ik tominsten ok aahn Kieken up Kompass un up dat "GPS", dat wi ok up ´n richtigen Kurs sünd. Un de Pico de Teide - mit 3716 Meters de höchste Barg up Teneriffa un in Spanien överhaupt - kummt näger un näger. Wi hollt twintig Grod rechts van hum up Santa Cruz to.

Mien Sön is in sien Element. He hett dat Teihn-Meter-Schipp goot in ´n Gripp. Middags kann ik mi sogor een Stünn in mien Koje up ´t Ohr leggen. Üm Klock dree is dat obers mit dat Kommodige vörbi. Wi sünd noch sowat van fiefteihn Seemeilen vör de Haben van Santa Cruz, dor geiht dat los: de suttje Nordost-Passat kriggt een düchtigen "Düsen-Effekt" an de Oost-Küst van Teneriffa un huult los mit Stärke sess bit acht. Wi hebbt Roll-Groß un Roll-Fock to rechte Tiet düchtig refft - un so hollt us Schipp dat goot ut. Wi loopen fief bit söben Knots un sünd doröver heel blied. Wi kieken Stünn üm Stünn up de massige, blaue Bulgen, de in een langen Ozean-Dünung van de Siet - mit halwen Wind - up us anrullen, us hochhieven, över de Brekerkamm sachte röverglieden laten un denn wedder up de anner Siet in een langen, deepen Bulgental rünnerschuwen. Bi dit Daalglieden maken wi de gröttste Fohrt van bit to acht Knots, un dat vull inrefft! Dat is haast al as Surfen. De Yacht liggt mennigmol düchtig up de Backbordsiet, man se löpt wunnerbor. Wi beid wesseln us an dat Stüürrad aff un hebbt een Seilers-Hochgeföhl; wi sünd blied, dat wi Hochsee-Seilen mit een säker Schipp, bi warm Wär un up dat blau Water van de Atlantik maken köönt. Wi snacken nich völ - dat kummt eerst wedder in ´n Haben. Wi kieken up dat grandios Ozeanwater un wi lustern konzentreert up Schipp, Wind un Bulgen. Wi vergäten sogor Äten un Drinken.

As wi denn de leste Seemeile mit Motor in ´n Haben van Santa Cruz rinnfohrt - üm Klock sess un al haast in ´n Düstern - dor föhl ik doch, dat ik verdammt müej worrn bin. Man, mien Sön un ik, wi sünd hoch tofräen - wi hebbt us Döpe as Blau-Water-Seilers kreegen.

In Santa Cruz - un denn ok noch in de anner Habens van Los Christianos un van San Sebastian up La Gomera un Puerto Rico up Gran Canaria - snackt wi mit anner Lü up Yachten un höörn van de, dat veel dorvan up ´n Sprung in de Karibik sünd. Wiehnachten in de Karibik! Dat weer doch wat! Dat schullen wi man ok maken! Mien Sön kriggt een Lüchten in de Oogen, man mi fallt in, wat ik noch allens in de Vörwiehnachtstiet in Ollnborg to besörgen heff.


Lesen Sie die YACHT. Einfach digital in der YACHT-App (iTunes und Google Play) oder bestellen Sie es im Shop als Abo oder Einzelheft:

iTunes Store Google Play Store Delius Klasing Verlag

Themen: LesereinsendungPlattdeutschTörnWeihnachten

Anzeige